Asociación de Mulleres de Moaña

UN LUGAR DE ENCONTRO PARA AS MULLERES DE MOAÑA

Texto elaborado por Óscar Rodríguez Martínez, socio de A Illa dos Ratos coa información e fotos facilitadas pola xunta directiva da Asociación de Mulleres de Moaña.

A Asociación de Mulleres de Moaña é unha entidade que vén realizando unha gran labor promovendo o empoderamento e a mellora da vida das mulleres a través da cultura e o activismo social, e que conta cun gran respaldo social entre as habitantes da vila moañesa. 

A Asociación de Mulleres de Moaña traballa pola defensa dos dereitos das mulleres e a posta en valor da lingua e a cultura galega

O proxecto de crear unha asociación de mulleres xurdiu no ano 1992 e tivo a súa orixe na celebración dun curso de alfabetización na Escola de Adultos de Moaña. A este curso acudiron moitas mulleres que ademais de sacar o graduado escolar continuaron posteriormente coa súa formación académica.

Parte delas decatáronse da importancia de seguir unidas e decidiron constituír legalmente unha asociación para organizar diferentes actividades.

Marcáronse como obxectivos principais a defensa dos dereitos das mulleres e a posta en valor da lingua e a cultura galega, e con estes piares de fondo comezaron a compartir o seu tempo de lecer, falando das súas experiencias e traballando en grupo a súa autoestima.

Comezaron a funcionar os diferentes obradoiros e accións formativas enfocadas a que as mulleres puidesen incorporarse a mellores postos de traballo. 

A asociación tivo un crecemento expoñencial respecto ao seu número de socias

Nun comezo eran 60 socias, pero deseguido pasaron a ser 180, despois  500, ata que na actualidade son xa máis de 2.000 asociadas. Grazas a esta iniciativa todas as mulleres teñen un lugar de reunión donde relacionarse.

Para que a Asociación de Mulleres de Moaña funcione correctamente e sexa o máis participativa posible existe unha xunta directiva que a día de hoxe está formada por 14 mulleres. Aínda que o traballo o fan entre todas, teñen repartidas as funcións en varias vogalías organizadas baixo a presidencia de Mª de los Ángeles Pena Bouzada. A vicepresidencia corresponde a Teresa Costa Olivera,  a secretaría a ocupa Mª Carmen Moreira Montes e a tesourería corre a cargo de Concepción Trigo Portela.

As reunións da xunta directiva teñen normalmente unha periodicidade mensual, variando en función dos temas a tratar e logo todas as asociadas reciben a información dos acordos máis relevantes e das actividades e horarios que se deciden a través de grupos de whatsapp, redes sociais e prensa.

A Asociación de Mulleres de Moaña busca mellorar a vida das mulleres a través da interacción e apoio social, a cultura e a formación

Aínda que a asociación está pensada para Moaña, tamén  acuden mulleres doutros lugares así como os fillos e fillas das asociadas que asisten ás diversas actividades que se ofertan. Poden asistir de pleno dereito a partir dos 18 anos ou antes coa autorización dos titores e sempre e cando a nai sexa socia.

A maioría das actividades ofértanse no local social situado no número 170 da rúa Concepción Arenal e que posúe un amplo horario de atención ao público. 

Algunhas das actividades organizadas son:

• Encaixe de bolillos.
• Ganchillo e calceta.
• Patchwork.
• Costura.
• Confección de roupa para nenos/as e bebés.
• Reciclaxe.
• Obradoiro de arte contemporáneo.
• Pandeireta.
• Guitarra.
• Pilates.
• Hipopresivos.
• Taichí.
• Zumba.
• Venres culturais enmarcados dentro das actividades que a asociación canaliza a través da “Universidade da vida Elisa de la Peña“.
• Curso dentro do programa “+Xuntas” que organiza cada ano a Deputación de Pontevedra.

Tamén teñen organizado moitas viaxes, tanto dentro como fóra do país. Estas viaxes leváronas a lugares como Asturias, Santander, Cuenca, Sevilla, Granada, Toledo, Córdoba ou Cádiz pero tamén en Marrocos, Estambul, Munich, Praga, Budapest, París ou  Italia, tanto en Roma como na Toscana.

Como actividades culturais propiamente ditas contan cun grupo de teatro que pertence a FEGATEA e un coro chamado “Chorima”.

Existe ademáis unha aula de cultura xeral e autoestima á que asisten mulleres de todas as idades. É un espazo no que se pode aprender moito con varias mestras que colaboran impartindo diferentes cursos de carácter gratuíto.

A figura de Elisa de la Peña González sempre presente no día a día da asociación e nos corazóns das socias

Nesta actividade tivo unha gran importancia a socia e mestra Dª. Elisa de la Peña González, falecida en 2018 tras unha longa enfermidade. A Asociación de Mulleres de Moaña leva traballando dende entón para que se recoñeza a súa gran labor mellorando a vida das mulleres de Moaña a través da cultura e pola súa gran implicación social.

Por todo isto, no pleno municipal celebrado o pasado día 8 de marzo de 2020, xa conseguiron que se lle concedese o título de filla adoptiva a título póstumo e un tempo despois lograron que o Concello lle adicase unha rúa na zona do Rosal. Ademais a asociación creou na súa horna a “Universidade da Vida Elisa de la Peña” a través da cal canalizarán as súas actividades culturais cada ano.

A Asociación de Mulleres de Moaña sempre está presente nas datas importantes da vila e cada ano participa activamente no Entroido e organiza a Festa do Mexillón de Moaña

Dentro dos actos públicos que organiza a asociación, as que cobran maior importancia son as relacionadas coa muller:

O 25 de novembro, “Día contra a violencia de xénero” organizan exposicións e presentacións de libros. Nesa mesma data, na Oliveira de Moaña, celébrase un acto simbólico para recordar ás mulleres vítimas de violencia de xénero. Faise unha análise das estatísticas e inténtase realizar un labor de concienciación sobre este grave problema.

Neste mesmo sentido, a outra data relevante para elas, relacionada coa muller, é o 8 de marzo “Día Internacional da muller traballadora” cando realizan diversos actos en colaboración co Concello.

As propias integrantes da asociación afirman que a idea que hai que reivindicar non é ser iguais aos homes, senón ter os mesmos dereitos e oportunidades. Este día a asociación celebra un acto reivindicativo que remata coa Festa das Mulleres, neste caso, exclusiva para as mulleres.

Ademais disto para as mulleres da asociación tamén hai tempo para participar doutras celebracións dunha índole máis cultural e festeira.

Como exemplo, no “Entroido de Moaña” é costume que as súas socias elaboren, en colaboración co Concello de Moaña, deliciosas filloas e orellas.

Tamén organizan a  Festa do Mexillón de Moaña, outra festa que xa ten unha gran tradición na vila e que mobiliza a moita xente. Para organizala contan coa colaboración de diversos productores que doan o mexillón mentres as mulleres o preparan para a súa degustación. Grazas ao recadado nesta festa obtense unha axuda económica importante para financiar as actividades de todo o ano.

Tamén fan gala dunha gran implicación coa cultura e a lingua galega e cada 17 de maio organizan o Festival polo Día das letras galegas.

Por último, dicir que estas mulleres incombustibles e dinámicas teñen demostrado ao longo dos anos que sempre están dispostas a participar das reivindicacións sociais e a botar unha man cando fai falla. Así o fixeron na concentración contra a guerra de Iraq, realizando labores de apoio na catástrofe do Prestige ou más recentemente nas mobilizacións para a defensa da sanidade pública, reclamando a volta das urxencias á Casa do Mar de Moaña.

Queremos agradecer as facilidades deste importante colectivo do Morrazo para a redacción deste artigo. Se alguén está interesado en contactar con elas para informarse máis en profundidade das súas actividades pode enviarlles un email a mullermoa@gmail.com.