Somos unha Asociación de Animación Sociocultural e Turística, sen ánimo de lucro, que nace no Concello de Cangas no ano 2016, co obxectivo de dinamizar e diversificar a oferta sociocultural e turística na Comarca do Morrazo e o Parque Nacional Marítimo Terrestre das Illas Atlánticas de Galicia.

As nosas actividades agrúpanse en dous ámbitos principais: a realización de actividades de animación sociocultural e a organización de rutas guiadas para dar a coñecer e pór en valor os nosos recursos turísticos xa sexan culturais, etnográficos ou ambientais.

Para levar a cabo as nosas actividades, ás que tratamos de aplicar un carácter ameno e didáctico, contamos con persoas de diferentes eidos e formación como o tempo libre, a animación sociocultural, o medio ambiente, o turismo e a cultura.

Para lograr os nosos obxectivos, dado que no noso ánimo está manternos sempre en contacto coa realidade que nos rodea, ademais de levar a cabo os nosos proxectos, sempre estamos abertos a colaborar con diversas institucións e colectivos da comarca.

Seguinte

Como expertos coñecedores da península do Morrazo e do Parque Nacional Marítimo Terrestre das Illas Atlánticas de Galicia sabemos que ambos espazos contan cunha gran riqueza ambiental.

Por isto, ademais das diferentes rutas que organizamos ao longo de todo o ano, tamén realizamos diversas actividades de concienciación ambiental que están dirixidas a todos os públicos.

Con elas ofrecemos a todas as persoas que o desexen a posibilidade de coñecer os nosos espazos naturais dunha maneira amena e didáctica, e fomentamos o respecto dos valores naturais coa realización de actividades prácticas como a recollida de lixo mariño e microplásticos en diferentes praias.