Rutas guiadas para a primavera de 2023

21 RUTAS GUIADAS GRATUÍTAS NA PRIMAVERA DE 2023

Un ano máis, e xa van sete, volvemos para propoñervos unha maneira amena e didáctica de coñecer o noso entorno a través das nosas rutas guiadas, nas que ata agora pasaron máis de 16.000 asistentes.

Nesta ocasión presentamos “Descubre Moaña na primavera 2023”, un proxecto de 11 rutas no que volvemos a colaborar co Concello de Moaña e “Primavera en ruta 2023” que estará composto por 10 rutas en diferentes localizacións de Cangas. Ademais todos os asistentes participarán no sorteo de 4 pases individuais para o Club Termal do Spa Bienestar de Moaña.

Coma sempre as nosos rutas son totalmente gratuítas pero ao finalizar os percorridos, @s nos@s guías ofrecerán aos asistentes a posibilidade de facer unha colaboración simbólica e voluntaria a favor da nosa asociación que empregaremos para a realización doutros proxectos.

“Descubre Moaña na primavera 2023” incluirá once rutas entre as que se incorporan dúas interesantes novidades

Neste programa os asistentes terán a oportunidade de descubrir a historia e algúns dos lugares máis interesantes de Moaña. Nesta ocasión combinaremos algunhas rutas clásicas como “San Martiño“, “A Moaña mariñeira“, “A Poza da Moura de Domaio“, “Literaria O último barco“, “Canteiras do litoral de Moaña“, “Sendeiro da Fraga” ou “Sendeiro de Rialdarca” xunto con dúas rutas novas tituladas “Historia das rúas de Moaña” e “A Torre de Meira“.

En Cangas ofertaremos prazas para outras dez rutas, enmarcadas no programa “Primavera en ruta 2023”  

Para Cangas presentamos un programa de 9 rutas diferentes, que inclúe grandes clásicos dos últimos anos como “Cabo Home e a Costa da Vela“, “Intermareal, mar a vista“, “Massó, o sentir dun pobo“, “O Hío, de pedra en pedra“, “Aldán, un condado a beira do mar“, “Muíños de Coiro“, “Senda Costeira de Areamilla“, “Serra da Madalena“, “O Facho, gardián milenario“.

Se estades interesados en asistir teredes que darvos moita présa porque as prazas son limitadas e a demanda moi elevada 

Os interesados deben inscribirse previamente por whatsapp no 611 08 08 53. Nun principio teremos un límite de 30 prazas por ruta e unha vez sexan completadas, habilitaremos as correspondentes listas de espera que xestionaremos de forma activa.

Todos os asistentes ás rutas de primavera participarán no sorteo de 4 pases individuais para o Club Termal do Spa Bienestar de Moaña.

Este ano dende a páxina de facebook “Historias do Morrazo” sortearemos libros relacionados cos contidos das rutas

Na nosa nova páxina de facebook Historias do Morrazo, o noso rato “Ratillán” viaxará cada semana a través do espazo e o tempo para levarnos aos interesantes momentos da nosa historia que aparecen recollidos nos artigos do noso blog.

Entre os seguidores da páxina imos a facer regularmente unha serie de sorteos de libros que gardan relación co Morrazo. Para que teñades unha idea, o ano pasado xa sorteamos exemplares de “Historia Fotográfica de Cangas. Século XX” (cortesía da A.C. A Cepa), “A pedra de ámbar gris” (Noa Setemuíños), “O último barco” (Domingo Villar, cortesía do Concello de Moaña), “As illas dos Deuses” (Serafín Parcero, cortesía da Editorial Xerais), ou “Canteiras do litoral de Moaña” (Tamara Campo Táboas, cortesía de Rinoceronte Editora e o seu selo Morgante).