Casas de pedra e rúas estreitas

O casco histórico de Cangas, a parte antiga, é esa zona da vila que todos coñecemos, pola que pasamos todos os días. Temos a impresión de que a coñecemos moi ben pero, é realmente así? Coñecemos todos os segredos que nos mostra? Somos capaces de interpretar toda a información que nos transmiten as súas casas de pedra e as súas rúas estreitas? Nesta ruta pretendemos ver o casco histórico dunha maneira diferente. Fixándonos naqueles detalliños que por estar aí desde sempre, nin sequera reparamos neles. Recorreremos os dous barrios, o Costal e o Sinal, e veremos o diferentes que poden ser dúas partes dun mesmo casco antigo.