Perfect! Un xogo de merda made in O Morrazo

O XOGO DE MESA QUE NACEU DUNHA “IDEA DE MERDA”

Texto elaborado por Óscar Rodríguez Martínez, socio fundador de A Illa dos Ratos, empregando fotografías e contidos obtidos a partir das conversas mantidas con Rubén Cembellín, creador do Perfect!

“Un xogo de mesa interactivo, no que todos participan todo o tempo e no que podes rir xogando e lendo, xa que cada carta ten ademais un chiste e nela aparece unha simpática e curiosa personaxe”

Rubén Cembellín Cordeiro

Rubén Cembellín Cordeiro (Pontevedra, 1979) é o creador de “Perfect!, un xogo de merda”, un xogo de mesa que ven de converterse no xogo do momento no Morrazo. Neste artigo coñeceremos ao seu autor e a curiosa forma na que se lle ocorreu a idea que daría orixe a este divertido xogo que está pensado para pasalo ben en familia ou cos amigos.

O creador de “Perfect!, un xogo de merda” ten raíces en Cangas, pero ata os 16 anos vivía cos seus pais en Madrid

Aínda que naceu en Pontevedra, o certo é que por circunstancias da vida, Rubén Cembellín Cordeiro pasou a súa infancia e adolescencia en Madrid. Sempre levou con orgullo a súa orixe galega e esa “morriña da terra” a paliaba cada verán vindo cos seus pais a Cangas para pasar as vacacións cos membros da súa familia que seguían residindo aquí, algo que tempo máis tarde sería determinante para que se mudase a nosa vila con 16 anos.

Segundo nos contou, Rubén nunca foi moi afeccionado aos xogos de mesa senón que como a maioría dos nenos dos anos 80 e 90, pasaba gran parte do seu tempo na rúa xogando ao fútbol, nos recreativos ou na casa xogando no ordenador ou coa súa Mega Drive.

Ata 2018 non comezou a probar cos amigos xogos como o Catán ou o Sushi Go e o feito desa afección nacese de maneira tardía e que non tivese cultura de xogos de mesa, encheron de frescura a súa creación, o Perfect!

A idea de crear algún contido relacionado coas cacas xurdiu pola gran cantidade de deposicións de can que Rubén se atopaba pola rúa

¿No vos pasou algunha vez que paseando polas nosas rúas pisastes unha caca de can? Pois este feito tan cotián foi o que inspirou a Rubén, unha persoa con moita imaxinación, inquietudes e á que sempre lle encantou facer xogos de palabras.

Comezou a fixarse máis detidamente nas feces de can que se atopaba, lles sacaba fotos, logo analizaba as súas formas e texturas para buscarlle un sentido e finalmente se inventaba unha historia. 

Un día atopaba unha caca con forma de interrogación e se lle ocorría “o dono deste can ten que ser un filósofo“; outro día a forma recordaba á dun xeado de máquina e pensaba “o dono deste can seguro que era pasteleiro“…

Pouco a pouco descubriu que o tema podía resultar moi divertido, así que comezou a anotar as ideas que se lle ían ocorrendo e tras varios meses acabou creando unha mini-guía con razas de can inventadas a imaxe e semellanza deses supostos donos que imaxinaba segundo as deposicións atopadas.

Un accidente laboral fixo que Rubén tivese tempo para desenvolver a idea de crear un xogo de mesa

Moitos anos antes do nacemento do xogo, Rubén estivo traballando como deseñador gráfico en Exclusivas Iglesias, unha das empresas máis importantes do Morrazo.

Cando o seu posto de traballo foi suprimido, quedou na empresa durante 17 anos exercendo funcións de mozo de almacén, ata que sufriu un accidente laboral que lle danou unha man.

Foi mentres estaba convalecente cando na súa cabeza comenzaron a tomar forma as primeiras ocorrencias que finalmente darían lugar ao Perfect!

Nunha noite de inspiración comezou a pensar en posibles personaxes con forma de caca cos seus respectivos nomes e historias. Entre outras ocorréronselle algunhas como “Caca Chernóbil” (aquela que cheira moi mal e que representou cunha máscara de gas) ou “Cacain Bolt” (a que sae moi rápido) e incluso foi máis aló e pensou en accións que poderían realizar esas personaxes.

Aí foi cando se lle ocorreu a idea de crear un xogo de mesa que incluíse diferentes cartas nas que as personaxes fosen tipos de cacas e que cada un deles levase aparellada unha acción.

O primeiro que fixo foi buscar como establecer unha relación entre o nome de cada personaxe, o seu deseño e a acción que se lle podía asociar. Pensou que os ataques poderían realizarse coas cartas de cacas e que para defenderse poderían empregarse outras nas que aparecesen representados algúns dos elementos que normalmente podemos encontrarnos nun cuarto de baño como unha escobilla, un rolo de papel hixiénico ou un desatascador. 

O xogo tivo un proceso de maduración de dous anos e medio nos que se foron testando diferentes personaxes, accións e dinámicas

A idea foi tomando forma pouco a pouco durante os dous anos e medio nos que Rubén estivo madurando o xogo e foron sucedéndose múltiples cambios que afectaron a súa dinámica.

Para asistir a eses eventos con algo máis elaborado, Rubén fabricou unhas cartas prototipo empregando unhas imaxes da internet e presentounas nunha caixa 3D deseñada polo seu irmán Iván.

 

Este traballo previo deu unha aparencia máis profesional ao xogo fronte á doutros participantes que asistiron con propostas que incluían cartas en papel de folio, debuxadas a man e metidas nunha simple funda de plástico.

 

 

O xogo tivo moi boa acollida nas feiras e a xente do sector coa que tiveron oportunidade de falar animáronlles a lanzalo porque lle vían moito potencial. De feito, autores doutros xogos que coñeceron o proxecto de Rubén foron moi amables con el e lonxe de ver o Perfect! como competencia, ofrecéronse a orientalo nos seguintes pasos que debía seguir se quería sacar o xogo ao mercado.

A experiencia nas feiras de xogos de mesa resultou tan satisfactoria que Rubén decidiu dar o paso definitivo e comezou a realizar el mesmo as ilustracións

A lesión sufrida na súa boneca, da que aínda sofre secuelas, provocou que finalmente fose despedido e iso fíxolle reformularse o seu modo de vida e emprender creando a súa propia empresa xunto á súa parella.

Así naceu Pink Souba Sociedade Cooperativa Galega que ten dúas liñas de traballo principais:

• Studio Creativo Gráfico, con funcións de deseño gráfico, creación de xogos de mesa e distribución.
• Pink Souba Clothing, dedicada ao deseño e confección de roupa única, urban e estilo propio baixo o lema “Rías Baixas Style”, con camisetas e suadoiros homenaxe ás Illas Cíes, o Morrazo e Galicia en xeral, confeccionando en Cangas as súas propias pezas e apoiando tamén o comercio local.

 

Unha vez posta en marcha a empresa, Rubén comezou coa fabricación do xogo, e o fixo mediante autoedición, é dicir, creado ao 100% por el, tanto idea orixinal, como mecánica, narrativa, ilustración, deseño gráfico e maquetación.

 

O resultado foi un xogo orixinal, financiado cos seus propios medios e fabricado 100% en Galicia, asumindo o aumento de custo de produción fronte a outros países como China ou Polonia, apostando por un produto nacional, fomentando a industria galega e o crecemento do sector de xogos de mesa en Galicia.

 

Esa primeira versión xa contaba con 108 cartas entre as que había catalogadas 43 tipos de cacas humanas, 9 tipos de cus e máis de 50 accións posibles. Para distribuílo, el mesmo encargouse de percorrer librerías, xogueterías e tendas de cómic do Morrazo e para promocionalo enviou o xogo a varios influencers importantes e lanzouse a organizar charlas e partidas en colexios e institutos, para que os seus potenciais consumidores coñecesen de primeira man a dinámica do xogo.