UN PASO IMPORTANTE NA CONSOLIDACIÓN DO MUVI 

Texto elaborado por Óscar Rodríguez Martínez en base a información facilitada por Jacobo Martínez, Director do Museo do Videoxogo de Galicia.

A túa inmobiliaria de confianza na Rúa do Sol, 19 de Cangas. Contacto 986 32 99 75 – info@lares.gal

O Museo do Videoxogo de Galicia (MUVI) medra ata os 300 metros cadrados e abre na súa nova ubicación en Cangas o vindeiro 10 de setembro de 2022

A Fundación Museo do Videoxogo de Galicia vén de anunciar que o vindeiro 10 de setembro se inaugurarán as novas instalacións do Museo do Videoxogo no número dous da rúa Aragón, na vila de Cangas do Morrazo.

Con estas novas instalacións o novo MUVI será a partir de agora un centro de preservación, exposición e experimentación da industria cultural do videoxogo, con capacidade para máis de 100 persoas e con amplos espazos para organizar diferentes exposicións sobre o mundo dos videoxogos.

Trátase dun espazo completamente novo, sete veces máis grande que o anterior, que conta con coleccións renovadas e con representantes de tódalas tipoloxías de sistemas que conforman a historia do videoxogo.

Poderemos atopar dende as míticas máquinas Arcade, pasando por videoconsolas, portátiles e dispositivos bidireccionais e ata unha selección dos títulos máis influíntes da súa historia.

En definitiva, un lugar con decenas de pezas para tocar, experimentar e xogar, que ademais contará con aulas e áreas de divulgación, que posibilitarán o desenvolvemento de proxectos no campo do videoxogo e que transcenderán ao ámbito nacional.

O videoxogo galego, un plus para o novo MUVI

Nesta nova etapa, o MUVI manterá a súa entrada semanal de balde (tódolos sábados de 16:30 a 20:00) e redobrará o seu compromiso coa industria de Galicia, contando agora con zonas exclusivas de preservación e divulgación especificamente adicadas.

Espazos galegos, nos que se conserva e expón de xeito interactivo o patrimonio cultural galego do sector, o seu corpus artístico: o total dos videoxogos comerciais dos últimos 25 anos e documentación sobre os autores, centros de ensino, entidades preservadoras e tódalas as asociacións e empresas que dalgún xeito forman parte dela.  

Unha viaxe experimental rica, que estará sempre en constante evolución, e a través da cal os visitantes poderán coñecer e probar os videoxogos creados en Galicia e na que o MUVI, xunto con videoxogo.gal, tende a man a empresas e persoas que desexen aportar información e recursos.

O NOVO MUVI

O novo MUVI se presenta como un novo punto de interese turístico galego

A Fundación Museo do Videoxogo de Galicia, o Concello de Cangas e a Dirección de Cultura da Xunta de Galicia apostan polo videoxogo como patrimonio a conservar, accesible de xeito universal e gratuíto polo menos unha vez á semana

O novo Museo xorde precisamente pola necesidade da Fundación de normalizar a súa actividade e de mellorar as súas zonas de traballo. Os seus impulsores buscan dar un salto de calidade que lles permita alcanzar todos os seus obxectivos e converter incluso ao MUVI nun novo atractivo que axude á desestacionalización do turismo na vila de Cangas. 

Ademais, con este impulso, os promotores do Museo buscan potenciar o feedback positivo que os visitantes foron deixando nestes case 4 anos de traxectoria,  especialmente tras a situación de pandemia e a posterior recuperación, onde milleiros de persoas tiveron contacto coas actividades da Fundación e o Museo.

Incorpóranse novos colaboradores e proxectos con pegada internacional

O nacemento do novo MUVI ven avalado por unha vertente de liñas de investigación estratéxicas que darán soporte á renovación e reinvención anual do MUVI, apuntando á súa visibilidade máis alá do ámbito local.

Por un lado, traballando coas tres universidades galegas, a través de convenios de colaboración con varias escolas e facultades do País. Por outro, no ámbito museístico, a Fundación Museo do Videoxogo anuncia unha nova alianza co Museo Arcade Vintage de Ibi (Alacante) formulando a primeira gran colaboración entre museos de videoxogos de España. 

O NOVO MUVI

A curto prazo esta colaboración culminará nun intercambio de pezas entre ámbolos dous museos, reforzando a presenza do mundo Arcade -un dos alicerces do videoxogo – no MUVI, e do que o prestixioso museo alacantino é un dos maiores expoñentes de Europa.

O novo MUVI nace grazas ao apoio social de varias entidades e organizacións

O novo Museo é unha creación da Fundación Museo do Videoxogo de Galicia, que nace grazas ao apoio social, avalado polo Concello de Cangas e polo patrocinio de empresas e asociacións galegas:

  • Concello de Cangas – Patrocinador preferente
  • Balidea  – Patrocinador preferente
  • Lares
  • Iseltec
  • Aitire 
  • Asociación Videoxogo.gal (Colaborador no espazo “O videoxogo Galego”)
  • imaxin|software (Patrocinador do espazo “O videoxogo Galego”)
  • PuntoGal (Patrocinador do espazo “O videoxogo Galego”)
  • Asociación Informática Solidaria
  • Vai@bit
  • Kabuki flux
  • Deputación de Pontevedra – Exposición efémera sobre Cine e Videoxogos
O NOVO MUVI
Interior do novo Museo do Videoxogo de Cangas.

O acto inaugural contará con representación da Xunta de Galicia, música en directo e unha exposición efémera sobre cine

O sábado 10 de setembro ás 17:30 levarase a cabo un acto no novo MUVI de Cangas, que  marcará o inicio do seu horario regular: tódolos sábados de 16:30 a 20:00.

O acto de inauguración contará coas intervencións de Galo Martínez, Presidente da Fundación MUVI; D. Anxo Lorenzo, Secretario Xeral de Políticas Culturais da Xunta de Galicia; Luz Castro, Presidenta de Videoxogo.gal; Aurora Prieto, Concelleira de Cultura do Concello de Cangas; e Jacobo Martínez, Director do Museo do Videoxogo.

Durante a tarde haberá un breve acto de música en directo que de seguro será do agrado dos visitantes, entre os que se atoparán diferentes personalidades do ámbito cultural e da industria galega do videoxogo que xa confirmaron a súa presenza. 

Ademais, a través dos fondos “Subvencións dirixidas a entidades sen fins de lucro para a realización de actividades culturais”, a Deputación de Pontevedra posibilita unha exposición efémera e interactiva sobre Cine, que explora a relación entre ámbalas dúas industrias culturais ao longo dos últimos 40 anos.

Dende A Illa dos Ratos queremos desexarlle ao novo MUVI unha longa vida chea de éxitos. De seguro que se converterá co paso do tempo nun referente a nivel internacional e ocupará un lugar destacado dentro da historia da nosa vila.

Óscar Rodríguez Martínez
Presidente A Illa dos Ratos en | + artigos

Socio fundador de A Illa dos Ratos.

Deixa a túa resposta

O teu correo electrónico non será publicado. Os campos con * son obrigatorios

Podes usar estas etiquetas e atributos en HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Información básica sobre protección de datos Ver más

  • Responsable A Illa dos Ratos.
  • Finalidad  Moderar los comentarios. Responder las consultas.
  • Legitimación Tu consentimiento.
  • Destinatarios  Dinahosting.
  • Derechos Acceder, rectificar y suprimir los datos.
  • Información Adicional Puedes consultar la información detallada en la Política de Privacidad.