(CASE) VINTE ANOS NON SON NADA …

Texto elaborado polos membros da Lonxa Literaria de Moaña.

A nós é que nos gustaba ler. Sinxelamente. Gustábanos ler e iamos a miudo á Biblioteca municipal de Quintela. E aí comezou todo.

Ocorréuselle ao bibliotecario o de xuntarnos, aglutinar a aquela xente dispersa que nós eramos e facer grupo. Quizais, pensou, se podería facer algunha actividade en común. Ler un libro e quedarmos para intercambiar impresións sobre el, podía ser?

A idea gustou e ampliouse. Se liamos un libro, talvez podiamos convidar ao/á seu/súa autor/a. E se se escollía alguén de preto, ao mellor, podía acudir e compartir a charla con nós. Semellaba factible. Decidimos intentar poñer en marcha a iniciativa.

Antes de decidir a constitución definitiva da Lonxa Literaria, os promotores organizaron varias tertulias literarias

Convidamos a Fran Alonso, que se prestou de bo gusto a acudir a este encontro. A estrea foi con Males de cabeza e deixou moi bo sabor de boca. Tanto, que se pensou en repetir a experiencia.

Foi o propio Fran quen suxeriu o seguinte libro. O editor de Seda, de Alessandro Baricco, andaba por Vigo. Esta novela estaba sendo un gran éxito editorial e quizais podiamos aproveitar a ocasión e traelo. Seguramente daría para unha conversa moi interesante. Por que non probar?

Aceptamos a proposta e repetimos a xuntanza. O resultado foi novamente moi gratificante. Tanto, que quedamos en insistir no formato de xeito periódico. A charla en torno a un libro semellaba funcionar.

Deste xeito comezamos a xuntármonos de cando en vez. Sempre se invitaba ao/á autor/a que nos acompañase na tertulia. Ocorréusenos tamén que cada un/unha podía recomendar ao/á seguinte.

E así comezou todo. O funcionamento da tertulia comezou a ser regular. Foi cuestión de tempo que pensaramos en formalizar o grupo, en constituírnos como asociación.

LONXA LITERARIA DE MOAÑA
Tertulia sobre o libro “Os señores do tempo” de Zé Paredes.

A Lonxa Literaria de Moaña puxo en marcha moitas máis iniciativas culturais como un concurso de microrrelatos, sesións de contos para cativos, tertulias xuvenís, recitais de poesía, lecturas dramatizadas e incluso rutas literarias

Pasaron case vinte anos desde que no 2002 nacera formalmente a Lonxa Literaria. Aquel grupo orixinario comezou a botar a pacer a imaxinación e as ganas de facer cousas. Fomos debullando outras ideas que se puxeron en marcha decontado: por que non convocar un concurso de microrrelatos (2003)? Ou, a semellanza da de adultos, unha tertulia xuvenil (2004)?

Para os máis cativos/as as sesións de contos podían estar ben (2005) e implicar a todo o alumnado na confección dun relato conxunto (o conto viaxeiro)  tampouco semellaba mala idea (2004).

A nosa incursión na poesía veu da man do Prestige. O afundimento do pesqueiro deu lugar a aquel primeiro recital, que acabou sendo multitudinario (2003) e iniciou o camiño para outros que viñeron detrás.

Co teatro comezamos máis tarde (2007). Sempre en colaboración coa Erregueté, a inclusión na tertulia das lecturas dramatizadas abriu posibilidades tan descoñecidas como sorprendentes.

Paseniño fomos ampliando actividades. Unhas, puntuais; outras, periódicas. Movémonos nun abano extenso que foi desde os concursos de marcadores de páxinas ata a polafía pasando por actividades literarias diversas: concertos musicados, rutas literarias, presentacións de libros, obradoiros de escrita, cursos de declamación, conferencias, doazóns de libros, homenaxes a escritores/as, colaboracións con entidades e asociacións…

LONXA LITERARIA DE MOAÑA
Edición especial dunha ruta literaria sobre “O último barco” de Domingo Villar, levada a cabo o 12 de Outubro de 2019, percorrendo diferentes localizacións do libro na zona de Tirán (Moaña).  A Illa dos Ratos tamén programa unha ruta similar titulada “O último barco“.

O balance global destes case 20 anos da Lonxa Literaria é moi satisfactorio

O saldo é cumprido. Nesta altura máis dun cento de escritores/as galegos/as acudiron á nosa chamada. A nosa actividade non sería a mesma sen a súa presenza. Moito lles temos que  agradecer e lles agradecemos. Non só a eles/as.

Nestes vinte anos a colaboración desinteresada de amigos, asociacións, particulares… fortaleceu a Lonxa Literaria. Os nosos éxitos débense tamén a todos/as eles/as. Xusto é recoñecelo.

Na actualidade, acabamos de convocar, co Concello de Moaña, o I Certame de Relato Curto en Igualdade mentres agardamos tempos mellores, eses nos que poidamos reunirnos de novo sen máscaras, sen medo da proximidade. Volvendo a ser nós. Esperemos non ter que agardar moito.

Lonxa literaria de Moaña

Asociación Lonxa literaria de Moaña é unha asociación cultural onde se realizan diferentes actividades literarias como tertulias, contacontos, lecturas dramatizadas, etc.

Deixa a túa resposta

O teu correo electrónico non será publicado. Os campos con * son obrigatorios

Podes usar estas etiquetas e atributos en HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Información básica sobre protección de datos Ver más

  • Responsable A Illa dos Ratos.
  • Finalidad  Moderar los comentarios. Responder las consultas.
  • Legitimación Tu consentimiento.
  • Destinatarios  Dinahosting.
  • Derechos Acceder, rectificar y suprimir los datos.
  • Información Adicional Puedes consultar la información detallada en la Política de Privacidad.