A UNIÓN DO HÍO (I)

A SOCIEDADE DE SOCORROS MUTUOS A UNIÓN DO HÍO (I)

Texto elaborado por Anxo Coya Otero, veciño do Hío e Premio Ignacio Cerviño á Recuperación/Promoción do Patrimonio 2019. Fotografías aportadas polo propio autor.

Tempo atrás, na miña infancia, preguntábame o motivo de porqué había unha rúa no Hío que lle chamaban “A Unión”. Co paso dos anos cheguei a ser coñecedor de que ese nome era un recoñecemento a uns veciños do Hío que emigraran a Arxentina e que foron os promotores para dotar a esta parroquia dunha mellora no eido da asistencia sanitaria.

Hoxe véxome na obriga de cadrar, ao xeito de homenaxe, unhas liñas que honren aos nosos antepasados que loitaron para que O Hío puidese ter unha sanidade e un ensino digno.

A Unión do Hío foi creada en 1924 por un grupo de veciños da parroquia que emigraran a Arxentina

A formación da Sociedade de Socorros Mutuos “A Unión” queda constituída o 9 de abril de 1924 por un grupo duns 50 laboriosos veciños que emigraron á Arxentina, maiormente á cidade de Buenos Aires.

A data reflíctese no contido dun caderno onde se expresa e define o regulamento dos estatutos da sociedade que consultamos grazas á cortesía da veciña Josefa Iglesias. O caderno viu a luz na imprenta Peón, de Vigo, e era da propiedade do socio José Iglesias Mariño, e nas últimas follas aparecen selados o pagamento mensual dos anos de 1952 ao 1965. Por non estendernos moito, citaremos tan só algúns dos seus artigos máis significativos de xeito textual:

“Título I: Nombre y objeto.

Artículo 1º- La Sociedad que, con el título LA UNIÓN existe en la parroquia  de Hío, Ayuntamiento de Cangas, tiene por objeto atender a los individuos a ella pertenecientes, con asistencia médica en sus enfermedades, o convalencia.

Título II. De los socios.

Art.2- El número de socios será ilimitado y pueden serlo cuantos lo soliciten, siempre que sean vecinos de  las parroquias de Hío, Aldán y Darbo. Pueden ser socios también las mujeres, las que disfrutarán de los mismos beneficios…..

TÍTULO IV. Beneficios que concede la Sociedad.

Art.11- Tienen derecho todos los asociados, a la asistencia médica a domicilio y en consultorio del mismo que tenga en su casa. A disfrutar las medicinas del botiquín de urgencia que el facultativo tenga en su poder, abonando aquellas, a precios de factura que la Directiva presente, interín la Sociedad no tenga fondos suficientes, para facilitarles gratuitamente….”.

Nos proxectos da Unión do Hío prevalecían a escolarización das crianzas e a mellora da sanidade veciñal

O primeiro médico contratado pola entidade foi don José Vázquez Posse. Así o podemos acreditar segundo a primeira reunión do colectivo que se celebrou o 13 de xullo de 1924. A crónica do xornal Faro de Vigo informa do seguinte:

“ Celebra hoy la popular Sociedad de Socorros Mutuos “La Unión” de la parroquia de Hío, su primera reunión trimestral para dar á conocer á sus asociados el estado económico de la misma.

Su activa Junta directiva que preside el concejal don Manuel Otero Ríos pone todos su entusiasmo para el mejor desempeño del cargo…. La Junta directiva ha trabajado incansablemente para colocar á la Sociedad en el estado floreciente en que se encuentra, teniendo en su voluntad férrea con su constancia con su actividad que vencer no pequeños obstáculos que á su paso se oponían á esa loable labor tan beneficiosa para la parroquia.

Y la Sociedad parece que marcha hacia un éxito total, lo proclama muy elocuentemente el significativo dato de que á ella pertenecen 1.633 socios según balance de 30 de Junio, último sin añadir nuevos inscritos en lo que vamos de mes.

Es de advertir que la parroquia de Hío tiene, según el último censo de población, 2.196 habitantes que si se deducen los pobres y ausentes se puede decir que a la mencionada Sociedad pertenece casi la totalidad de los vecinos.

Cuenta ya “La Unión” con un competentísimo facultativo, el ilustrado médico don José Vázquez Posse, que en su prestigio contribuye al engrandecimiento de esta Sociedad. Uno de los proyectos, entre otros, que en breve va a poner en práctica la Directiva … es facilitar medicinas gratuítas á sus asociados…

Esta Sociedad nacida en Abril último, organizada por un puñado de laboriosos vecinos, que apenas llegaban á medio centenar, está próxima á la cumbre del completo florecimiento…” (Faro de Vigo, 13/07/1924).

A xunta directiva de A Unión do Hío quedou constituída a comezos do 1925 con Manuel Otero Ríos como presidente

Segundo o mesmo xornal, constátase que no primeiro día de 1925 a comisión directiva desta asociación quedou constituída polos seguintes membros: Manuel Otero Ríos de Liméns como presidente, Manuel Iglesias Hervello (sic) como vice-presidente, José Lorenzo Fernández, secretario, Leonardo Piñeiro Martínez, vice -secretario, Roque Gutiérrez Lemos, contador, e o cargo de tesoureiro correspondeulle á persoa de Manuel Otero Prieto. Foron vocais José Mariño Gutiérrez, Juan Menduíña Otero, Manuel García García, Victoriano Soliño Martínez e Manuel Otero Costas.

O número de asociados seguía en aumento, pois en menos dun ano ascenderon a 1765 socios. Días máis tarde, concretamente o 13 de xaneiro de 1925, ofreceu unha conferencia na parroquia o avogado don Ramón Salgado. O acto celebrouse no local social do organismo veciñal, que algún informante intuíu no seu día que debeu ser na casa da propiedade de Ramona González Chamadoira, ou ben nunha casa que se atopa arriba da fonte do Gheu.

O facultativo José Vázquez Posse fora contratado para exercer o oficio de médico na parroquia, mais non chegou a un ano como tal. Mergullándonos na prensa antiga, recompilamos unha crónica do xornal “El Progreso” na edición do 25 de xullo de 1925, onde menciona ao doutor Vázquez Posse atendendo a un home que se suicidara, tirándose do balcón da súa vivenda da rúa da Amargura (válgame Deus!!), na cidade da Coruña.

En sucesivas edicións do Faro de Vigo do mes de marzo dese ano de 1925, aparece o anuncio para ocupar a praza de médico no Hío rematando o prazo da convocatoria o 20 do mesmo. O soldo do médico ascendía á cantidade de 4000 pesetas anuais.

O Faro de Vigo do 31 de marzo de 1925, dinos que tomou posesión da praza o doutor don Enrique García Fociños, sobriño do tenente coronel médico don Alfredo Pérez Viondi, director do Hospital Militar de Vigo por aquela data.