A Illa dos Ratos alcanza as mil rutas

🐭🐭 MIL RUTAS, MIL HISTORIAS E UN MESMO CAMIÑO 🐭🐭

Texto de Óscar Rodríguez Martínez, socio fundador da Asociación A Illa dos Ratos.

A Asociación A Illa dos Ratos acada as mil rutas guiadas no Morrazo tras dez anos de actividade 

O pasado domingo 28 de xuño, a Asociación A Illa dos Ratos acadou, tras dez anos de actividade, a impresionante cifra de 1.000 rutas guiadas no Morrazo. 

Nesta ocasión a ruta realizada foi  «A Moaña mariñeira» e entre os máis de 70 asistentes estiveron algúns dos nosos seguidores máis fieis, pero tamén personalidades do ámbito político, como Leticia Santos e Coral Ríos, alcaldesa e concelleira de Turismo do Concello de Moaña, respectivamente; e do mundo da cultura, como Fernando Cuñarro, da A.C. A Cepa de Cangas; Cuqui Piñeiro, en representación da Fundación Xoán Piñeiro; ou Pepe Sequeiros, impulsor da Festa Popular de Bronlle en 1976 e presidente da traída de augas de Meira-A Torre en dúas ocasións.

Como en edicións anteriores, durante o percorrido falamos da estreita vinculación de Moaña co mar pero nesta ocasión tan especial, ao final de cada parada, dedicamos tamén uns minutos a lembrar a nosa traxectoria e a render homenaxe a algúns asistentes. 

Durante a presentación, tomaron a palabra Coral Ríos e Leticia Santos, concelleira de turismo e alcaldesa de Moaña

Ao inicio do percorrido, logo dos discursos das autoridades, falamos da orixe do Porto de Moaña e da primeira batea instalada na ría aló por 1932, e a continuación presentamos a Ana Portela Maquieira, a única persoa que participou na primeira ruta organizada por A Illa dos Ratos en 2016.

Tamén tiñamos previsto que estivese presente Tania Castro, concelleira de Turismo e Medio Ambiente do Concello de Cangas durante a lexislatura 2015-2019. Dende o seu cargo converteuse nun importante apoio nos nosos inicios e queríamos facerlle unha pequena homenaxe que finalmente non foi posible, pero aínda así lemos unha mensaxe súa aos presentes na que nos felicitaba e poñía en valor o nosa traxectoria.

Os asistentes foron os protagonistas durante o percorrido 

A seguinte parada a fixemos diante do Pazo do Real. Alí falamos dos cinco almacéns de salga cos que chegou a contar Moaña e a continuación, explicamos a vinculación do pazo coa figura de Méndez Núñez, contando para iso coa intervención de Maricruz Suárez-Rivero, membro da Asociación Amigos dos Pazos e descendente da familia do ilustre mariño.

Na escultura adicada ao “Mariñeiro Carrexador” pedimos que algúns dos nosos ratos máis carismáticos como Nacho, Jose, Carmen ou Nazario nos contasen que ruta lles gustara máis de todas as que fixeran ata o momento.

Avanzamos ata o antigo Pósito de Moaña para coñecer o papel de José Costa Alonso na súa constitución e a importancia desta organización para mellorar a vida da xente do mar. A continuación pedimos que dixeran unhas palabras Pepe Sequeiros, Fernando Cuñarro, Cris Ambel, Maricruz Rivero, Bety e Cuqui Piñeiro.

E chegamos a escultura do “Fisgón”, obra de Manuel Varela onde, antes de facer a foto de grupo, reflexionamos sobre o importante papel das mulleres nas actividades relacionadas co mar que xurdiron en terra: as peixeiras, as redeiras, as mariscadoras, as empregadas das conserveiras e as carreiras.

Na escultura dedicada ao “Mariñeiro e o emigrante”, de Magín Picallo, lembramos os naufraxios máis importantes da historia de Moaña, como o Ave do Mar (1956) ou o Centoleira (1964).