A Biblioteca das Madeiras do Mundo

UNHA BIBLIOTECA CON ALMA DE MADEIRA EN CANGAS

Texto elaborado por Óscar Rodríguez Martínez, socio de A Illa dos Ratos en colaboración con Agustín Soage Bastón, promotor do proxecto “Biblioteca das Madeiras do Mundo”.

“A madeira é unha forma que nos achega á mirada dunha árbore e a sabedoría e a memoria que esconde no seu interior; os libros resultantes, ademais de devolvernos a súa mirada, tamén nos mostran o corazón da madeira que empregamos”

Agustín Soage Bastón forma parte da terceira xeración dunha familia adicada á madeira. En 1934 o seu avó paterno comezou cortando árbores para subministrar troncos a empresas do sector e acabou instalando o seu propio serradoiro, o mesmo no que hoxe en día xira a vida de Agustín e a súa irmá.

Dende o seu “Eco Espazo da Madeira”, situado no número 44 da Avenida de Ourense, crea de xeito artesán tanto mobles como outras pezas e dende fai uns anos traballa para convertelo nun espazo cultural onde facer exposicións, presentacións de libros e outras propostas.

Unha moi especial é a Biblioteca das Madeiras do Mundo, a iniciativa da que vos falaremos neste artigo e que, como cada ano, se puido visitar de maneira gratuíta entre o 17 de maio e o 11 de xuño, coincidindo coa celebración do Día das letras galegas.

A Biblioteca das Madeiras do Mundo, unha iniciativa orixinal e única que xurdiu en Cangas da man de Agustín Soage Bastón

Coa madeira como fonte de inspiración, foi no ano 2013 cando este artista tivo unha das súas brillantes ideas para achegar este elemento natural, saudable e ecolóxico ao sentir humano: crear unha biblioteca de libros de madeira. 

A iniciativa xurdiu precisamente do coñecemento e o amor este artista e artesán profesa polas diferentes especies de árbores que leva traballando toda a vida. Para os primeiros exemplares, empregaba os restos que lle sobraban dos recortes de madeira do seu taller (piñeiro, eucalipto, carballo, acacia ou castiñeiro) pero co paso do tempo comezou a incorporar outras especies de orixe tropical (sapelli, wengué, teca de Birmania) ou frondosas americanas.

Cada libro da Biblioteca das Madeiras do Mundo xorde a partir dun anaco de madeira coa súa propia historia

O proceso de cada novo libro da biblioteca é case sempre o mesmo. Agustín selecciona o tipo de madeira e logo a traballa para darlle forma de libro. Logo entrega as pezas a amigos e coñecidos para que empreguen a súa creatividade sen ningún tipo de condición previa e van incorporando textos, poemas, debuxos ou incluso algún obxecto.

As diferentes características de cada especie de madeira empregada, o seu lugar de procedencia, os usos para os que foi empregada ou as condicións ambientais ás que estivo exposta, fan que cada anaco de madeira sobre o que Agustín comeza a traballar xa sexa orixinal e conte cunha identidade propia de seu.

A maiores cada peza incorporará ademais a personalidade e os sentimentos que aportan os diferentes autores, condicionados polas súas profesións, vivencias, cultura, lingua ou incluso polos seus momentos vitais.

Todo isto provoca que cada libro da Biblioteca das Madeiras do Mundo conte unha historia diferente e que cada peza teña a súa propia alma, sendo única e irrepetible.

Entre os máis de 200 libros da Biblioteca das Madeiras do Mundo podemos atopar obras de persoas moi diferentes

Podemos falar da Biblioteca das Madeiras do Mundo como un proxecto multicultural e transversal no que a día de hoxe teñen participado autores de 11 países (España, Portugal, Francia, Perú, Alemaña, Inglaterra, Xapón, Bélxica, Colombia, República Dominicana e Grecia) e 7 linguas diferentes.

Grazas a esta gran diversidade, entre os autores desta particular colección, podemos atopar obras de nenos e nenas, estudantes, actores, médicos, escultores, profesores, músicos, arquitectos, artesáns, carpinteiros ou cociñeiros, moitos deles cunha especial relevancia no seu ámbito.

Deste xeito, atopamos obras de persoas relacionadas directamente con Cangas como Xosé Vázquez Pintor, Henrique Prado Miranda, Honorato Parcero ou José Vieira, pero tamén de outras persoas que non o están tanto como caso do televisivo Víctor Fábregas, o escritor Manuel Lourenzo ou o produtor e director Ángel de la Cruz.

Como destacar algunha obra concreta sería unha tarefa complicada, a continuación vos presentamos algúns dos libros que poderedes contemplar se vos animades a pasarvos pola exposición.